Қайд этилганидек, юртимизда ич­ки бозорнинг қурилиш материалларига бўлган талаби қондирилиши ба­робарида, унинг катта қисми экспорт­га йўналтирилмоқда. Масалан, 1991–2016 йиллар мобайнида 50 та корхона томонидан ишлаб чиқарил­ган умумий қиймати 885 млн долларлик маҳсулот хорижга жўнатилди. Айни пайтда, компаниямиз корхоналарнинг экспорт салоҳиятини янада ошириш мақсадида Туркманистон, Қозоғис­тон, Қирғизистон, Россия, Озарбай­жон ва яна бошқа бир қатор мамлакатларда дилерлик тармоқлари ва ваколатхоналарини очиш бўйича иш олиб бор­моқда.

     Шуни ҳам айтиш лозимики, «Na­tional Ceramics» қўшма корхонаси то­монидан «Ангрен» махсус индустриал ҳудудида керамогранит, сопол плиткалари ишлаб чиқаришни ўзлаш­тириш белгиланган бўлиб, умумий қиймати 21,1 млн долларлик ушбу лойиҳани амалга ошириш ишлари деярли якунланиб қолди. Бундан таш­қари, шу кунларда Чирчиқ шаҳридаги «Crystal-Wei Jin Shi» қўш­ма корхонаси жамоаси шиша крис­таллит маҳсу­лоти ишлаб чиқаришни йўлга қўйиш лойиҳаси устида иш олиб бормоқда. Мана шундай ўсиш ва ижобий кўрсаткичлар натижасида эса республикамизнинг ички бозорида сифатли қурилиш материалларига бўлган эҳ­тиёжлар тўлиқ қон­дирилиб, минглаб иш ўринлари яра­тилмоқда. Тармоқ корхоналари томонидан тайёрлана­ётган маҳсулот­лар­нинг рақобатбар­дошлиги ҳамда экспорт салоҳиятини ошириш мақса­дида халқаро талаб­ларга жавоб берувчи сифат бошқару­ви тизимларини жорий этишга алоҳи­да эътибор қаратилаётгани туфайли бугунги кунга келиб, компаниянинг 30 та корхонасида ISO 9001:2008 хал­қаро сифат менежменти тизими йўлга қў­йилди. 2016–2017 йилларда «Ўзстандарт» агентлиги билан келишил­ган ҳолда, яна еттита корхонада ISO 9001 сифат менежменти, иккита корхонада эса ISO 50001 энергия менежменти тизимларини қўллаш кўзда ту­тилмоқда. Жорий йилда ISO 9001 сифат менежменти тизимини «Jahongir Servis» МЧЖ, «Оҳангаронцемент» АЖ, «Қу­ва­сойцемент» АЖ­да, ISO 50001 энергия менежменти тизимини «Бухорогипс» ҚК АЖда тат­биқ қилиш бел­гиланган бўлиб, ҳо­зирги пайтга қа­дар «Бухорогипс» ҚК АЖ ва «Қува­сой­цемент» АЖга қайтадан сертификатлар бериш ишлари олиб борил­моқда.

     Иқтисодиётни демократлаштириш ва эркинлаштириш борасида амалга оширилаётган ислоҳотлар ва тадбиркорлик соҳасида яратиб берилаётган қулай шарт-шароитлар ту­файли, ички бозорни сифатли ма­ҳал­лий қури­лиш материаллари, маҳ­сулотлар билан тўлдириш, импорт ўрнини босиш ва экспорт ҳажмини ошириш кўзда тутилмоқда. Натижада, ички бозорнинг импорт ўрнини босувчи маҳсу­лотларга бўлган эҳти­ёжлари тўлиқ таъминланиши баробарида, жаҳон бозорига дадил кириб бораётган ма­ҳал­лий ишлаб чиқарув­чилар сафи йил сайин кенгаймоқда. Хусусан, 2012–2015 йилларда республикамизга импорт қилинган қури­лиш материаллари таҳлили асосида 150 млн долларлик 15 турдан зиёд қу­рилиш материалларини ўзимизда тайёрлаш масаласи кўриб чиқилган эди. Натижада, 50 дан ортиқ корхоналарда қу­руқ қурилиш қоришма­лари, «Тош­ҚМК» АЖ ҳамда«Moderna Ceramic Industries Fergana» қўшма корхонасида сопол плиткалар ишлаб чиқа­риш ҳажми оширилди. «Art Mosaic», «Azia Mosaic», «Bill Tosh», «Fiammata» сингари МЧЖларда эса «майолика», яъни безакловчи материалларни ишлаб чиқариш ўзлаштирилди. Натижада, сўнгги уч йил давомида қури­лиш материалларига бўлган эҳтиёж­лар ошиб бораётганига қарамасдан, уларни импорт қилиш ҳажми 3,5 баробарга қисқаришига эришилди.

     Муҳими шундаки, 2015 йил натижаларига кўра компания томонидан 2,2 трлн сўмлик саноат маҳсу­лотлари ишлаб чиқарилган бўлиб, ўсиш суръати аввалги йилга нисбатан 6,1 фоизни ташкил этди. Жорий йилда ушбу натижалар янада яхшиланади. Яъни, тизимдаги кенг кўламли ислоҳотлар, истиқболли лойиҳаларни самарали татбиқ этиш, мавжуд ўзгариш ҳамда янгиланишлар ушбу мақ­садни амалга ошириш учун пухта замин яратмоқда.

     Юртбошимиз раҳнамолигида амал­га оширилаётган ислоҳотлар туфайли мамлакатимиз саноати тез суръатлар билан ўсаётган, иқтисодий қудра­ти ва са­лоҳияти юксалаётган замонавий давлатга айланди. Бунинг тас­ди­ғини мус­тақиллик йилларида қу­ри­лиш материаллари саноатидаги из­чил исло­ҳот­ларда, қайд этилган рақам ва кўр­саткичларда яққол кў­риш мумкин. Қурилиш индустриясини ривож­лантиришга жиддий эътибор қара­тилаётгани, шаҳар ва қиш­лоқ­лари­мизда йилига минглаб шинам ва қу­лай уй-жойлар ҳамда инфратузилма объектлари бунёд этилаётгани ҳам фикримиз тасдиғидир. Бугун юртдошларимиз нигоҳидаги яратувчанлик иштиёқи, ўз меҳнати маҳ­сулидан мамнунлик, узоқ-яқин­даги қўшниларимизнинг эътироф этишлари қалбларимизни фахр-ифтихор туйғулари билан чулғайди.

     Мамлакатимиз раҳбари кўп бор қайд этганларидек, биз ҳар бир хатти-ҳаракатимизни, амалга оширажак барча эзгу ишларимизни буюк келажак қуриш учун қаратсак, албатта, мақ­саду муродимизга етамиз. Биз ҳеч қачон, ҳеч кимдан кам бўлмаганмиз ва ҳеч қа­чон кам бўлмаймиз, деган ғоя катта-ю кичикни, ёшу қарини ил­ҳомлан­тириши, буюк ишларга сафарбар этиши аниқ!

 

Тимур МУХАМЕДЖАНОВ,
«Ўзқурилишматериаллари» АК матбуот хизмати котиби

ПОСЛАТЬ ДРУГУ

 ПЕЧАТЬ

Интервью