Мазкур ДТС ва ўқув дастури асосида бошланғич 1–4-синфлар учун дарслик мажмуалари (дарслик, ўқи­тувчи китоби, машқ дафтари ва DVD диск) яратилиб чоп этилди ва ўқув­чиларга бепул тарқатилди. 5–9-синф­ларда дарс бераётган ўқитувчилар учун чет тиллари бўйича методик қўл­ланмалар янги стандарт асосида қай­та яратилиб, чоп этилди.

     Бошланғич синфларда чет тилларини ўқитиш учун 17222 та чет тили хоналари тайёрланди ва уларнинг барчаси DVD-магнитола, ўқув-кўр­газ­мали қуроллар, луғат ва адабиётлар билан таъминланди. 2014 йилда 2457 та бошланғич синфларга ноутбук компьютерлар, проектор ва бош­қа техник воситалар етказиб берил­ган бўлса, 2015 йилда эса 4193 та бош­лан­ғич ва 1500 та 5–9-синфлар ана шундай илғор техник жи­ҳозлар билан таъминланди. Йилнинг энг яхши 42 нафар инглиз тили ўқитувчи­си Буюк Британиянинг нуфузли университетида ихтисослик бўйича малака оширишди.

     Президентимиз ташаббуси билан фарзандларимиз истеъдодини рўёбга чиқариш ва камол топтириш, ёш­ларнинг маданий савиясини юксалтириш, улар қалбига санъат орқали миллий ҳамда умуминсоний қадри­ятларни сингдириш мақсадида қабул қилинган болалар мусиқа ва санъат мактабларининг моддий-техника базасини мустаҳкамлаш, улар фаолиятини тубдан яхшилашга оид 2009–2014 ва 2016–2020 йилларга мўлжалланган давлат дастурлари қабул қи­линди. Ана шу дастурлар доирасида 301 та болалар мусиқа ва санъат мак­таблари ва учта мусиқа академик лицейлари янгидан қурилди ва реконструкция қилинди. Натижада, бу­гунги кунда 142 та ёки 47 фоиз бола­лар мусиқа ва санъат мактаблари замонавий биноларга эга бўлди. Улар 137 млрд сўмлик мебель, мусиқа чол­ғу асбоблари ва махсус ускуналар билан жиҳозланди. Дастур доирасида болалар мусиқа ва санъат мактаб­лари 48 номдаги 19741 нусхада ўқув қўлланмалари, 39603 та ноталар тўп­лами, жаҳон ва миллий композиторларнинг асарлари қайд этилган 1112 та CD дисклар, 556 та кўргазмали ма­териаллар билан таъминланди. Нати­жада, болалар мусиқа ва санъат мактабларига 2008 йилдаги 38 минг нафар ўрнига 2016 йилда 59,3 минг на­фар ўқувчи жалб қилинди.

     1991 йилда республика халқ таълими тизимидаги барча спорт иншоотлари ва сузиш ҳавзаларининг сони бармоқ билан санарли эди. Мустақил­лик йилларида эса мамлакатимиз­да жисмоний тарбия ва спортни кенг ми­қёсда ривожлантириш устувор масалалардан бирига айланди. Ай­ниқ­са, болалар спортини ривожлантиришга алоҳида эътибор қаратилди. Натижада, 2479 та иншоотни (2178 таси спорт иншооти, 301 таси болалар му­сиқа ва санъат мактаби) қуриш, ре­конструкция қилиш, мукаммал таъ­мирлаш учун жами 1,58 трлн сўм маб­лағ сарфланди.

     Мамлакатимизда ўқувчи ёшларни оммавий равишда жисмоний тарбия ва спортга жалб қи­лишга қара­тил­ган спорт мусобақа­ларининг уч бў­ғинли ягона тизими жорий этилди. Ай­ни пайтда «Умид ниҳоллари», «Бар­камол авлод» ва «Универсиада» спорт мусобақала­рини тизимли ташкил этиш тажрибаси дунёдаги кўплаб ривожланган давлатларнинг ҳам қи­зиқишига сабаб бўлмоқда. Ҳозирда мамлакатимизда спорт билан шуғул­ланувчи болалар улуши 2003 йилдаги 20,4 фоиздан 2016 йилда 57,2 фоизга ошди, қизлар улуши эса мос равишда 16,4 фоиздан 46,9 фоизга етди.

     1991 йилда халқаро миқёсдаги спорт мусобақаларида ўнта олтин, тўққизта кумуш ва 13 та бронза – жами 31 та медаль олинган бўлса, мус­тақиллик йилларида ўтказилган 487 та халқаро спорт мусобақаларида 5369 нафар (1955 нафари қизлар) ўқувчи-спортчиларимиз жами 1886 та, жумладан, 716 та олтин, 534 та кумуш, 636 та бронза медалларини қўлга киритишди.

     Ўқувчи-ёшлар ўртасида ватанпарварлик, миллий ифтихор туйғула­рини ривожлантириш, уларни миллий менталитетимизга ёт ғоялар ва маънавий таҳдидларнинг зарарли таъсиридан ҳимоялаш, улар онгида соғлом турмуш тарзи, миллий ғоя ва мафкурани шакллантириш борасида мақсадли ва тизимли ишлар амалга оширилди.

     Мустақиллик давригача «Баркамол авлод» болалар марказлари фаолияти маълум бир йўналиш асосида ташкил этилиб, уларнинг моддий-техник ҳолати таъмирталаб ва ачинарли ҳолатда бўлган бўлса, муста­қил­лик даврида мазкур таълим мас­канлари кўп тармоқли, замон талаб­ларига жавоб берадиган йўналишларга асосланган таълим марказларига айлантирилди.

     Республикамизда ташкил этилган 211 та «Баркамол авлод» болалар марказларидаги беш мингдан ортиқ техник, бадиий ижодиёт, ўлкашунос­лик ва экология йўналишларидаги тўгаракларда 114 минг нафарга яқин ўқувчи-ёшларга қизиқишлари бўйи­ча бошланғич касб-ҳунар сирлари ўр­гатилмоқда. Шунингдек, умумтаълим мактабларида ташкил этилган 150 мингдан ортиқ фан тўгаракларига 2,8 млн нафар ўқувчи жалб қи­линган. Ўқувчиларнинг ёзги таъ­тил­ларини мароқли ўтказишлари учун ҳар йили 1000 дан зиёд соғ­ломлаш­тириш оромгоҳлари фаолият юрит­моқда.

     1995 йилгача республикамиз мактаб ўқувчилари бирорта халқаро фан олимпиадасида иштирок этмаган. Мус­­тақиллик йилларида мамлакатимизда таълимнинг узвийлиги ва узлуксизлигини амалда таъминлаш юза­сидан олиб борилган улкан ишлар натижасида республикамиз мактаб ўқувчи­лари халқаро фан олимпиадаларида фаол иштирок эта бошлади. Яъни, 253 тадан – 20 та олтин, 58 та ку­муш, 175 та бронза медалини қўлга киритган ўқувчиларимизнинг муваф­фа­қи­ятидан ҳар қанча фахрлансак арзийди. Мисол учун, 2015 йилнинг 27–31 июль кунлари Хитойнинг Чанчунь шаҳрида математика бўйича бў­либ ўтган халқаро мусо­бақада икки нафар ўқувчимиз жаҳон­нинг 29 та дав­латидан 600 нафардан ортиқ иқти­дорли ўқувчилар орасида кумуш ме­далига лойиқ, деб топилди. Умумжамоа ҳисобида эса Ўзбекистон ўқув­чилари иккинчи ўринга сазовор бўлишди.

     Мусиқа ва санъат таълимига берилаётган эътибор, яратилаётган за­монавий шарт-шароитлар натижасида ўқувчиларнинг халқаро танлов ва фестивалларда қўлга киритаётган ютуқ­ларига ҳар қанча тасанно айтсак ҳам оз. Қолаверса, фар­занд­ларимиз мунтазам равишда иш­тирок этиб келаётган бундай хал­қаро танловларнинг гео­графияси кенгайиб бормоқ­да. Бундан 20 йил олдин 3–4 нафаргина ўқувчимиз халқаро танловга йўл­ланма олган бўлса, мус­тақиллик йилларида истеъ­додли ёш­ларимиз ҳар йили Франция, Италия, Германия, Буюк Британия, Руминия, Голландия, Польша, Россия, Озарбайжон каби кўплаб давлатларда ўтказилган турли хил нуфузли халқаро танловларда иштирок этиб, 44 та Гран-при, 255 та 1-ўрин, 159 та 2-ўрин ва 170 та 3-ўрин­ни олишга мушарраф бўлди.

     Бу заминда устоз-мураббийлар ҳа­миша эъзозда. Давлатимиз томонидан фарзандлар камолига меҳнати сингган, уларнинг таълим ва тарбия­си учун умрини бахшида этган устоз мураббийларга доимо алоҳида эътибор қаратиб келинади. Мустақиллик йилларида таълим соҳаси ривожига қўш­ган ҳиссаси ва фидокорона меҳ­нати учун жами 4026 нафар устоз ва мураббийлар турли давлат мукофотлари билан тақдирлангани юқори­даги фик­римизнинг далилидир. Шулардан 6 на­фари «Ўзбекистон қаҳра­мони», 124 нафари «Эл-юрт ҳурмати» ордени, 33 нафари «Фидокорона хиз­матлари учун» ордени, 300 нафари «Меҳнат шуҳ­рати» ордени, 508 нафари I ва II даражали «Соғлом авлод учун» ордени, 392 нафари «Дўстлик» орденлари билан мукофотланди. Бундан ташқари, ёш авлодни ақ­лан ва жисмонан баркамол этиб тар­биялашдаги ҳалол ва самарали хиз­мати учун 20 нафари «Жасорат» медали, 1351 нафари «Шуҳрат» медали, 303 нафари Ўзбекистон халқ ўқи­тувчиси, 315 нафари Ўзбекистон Рес­публикасида хизмат кўрсатган халқ таълими ходими, 398 нафари Ўзбекис­тон Республикасида хизмат кўрсатган ёшлар мураббийи унвонларига сазовор бўлишди.

     Хулоса қилиб айтганда, Юртбошимизнинг бевосита раҳбарлигида ишлаб чиқилган «Таълим тўғрисида»­ги, «Кадрлар тайёрлаш миллий дастури тўғрисида»ги қонунлар асосида яратилган малакали кадрлар тайёрлаш тизими ўзининг стратегик мақ­садларга эга эканини намоён қил­моқда. Бу эса, шубҳасиз мамлакатимизнинг буюк келажагини қу­ришда муҳим аҳамият касб этади.

 

ПОСЛАТЬ ДРУГУ

 ПЕЧАТЬ

Интервью