Велоспорт. Таиландда давом этаётган Осиё чемпионатида ҳамюртимиз Тимур Гумеров олтин медаль соҳиби бўлди.
Иқтидорли велоспортчимиз трек йўналишининг кўпкураш баҳсларида рақибларига ҳеч қандай имконият қолдирмади ва қитъа чемпионлиги билан бирга 2016 йили Бразилияда ўтказиладиган XXXI ёзги Олимпия ўйинлари йўлланмаси учун муҳим рейтинг очколарини қўлга киритди.
Ёшлар ўртасидаги мусобақада қатнашган яна бир ҳамюртимиз Дилмурод Сиддиқов қитъа чемпионатининг бронза медали билан тақдирланди.
Чемпионат 14 февралга қадар давом этади.
Шахмат. Англиянинг Бирмингем шаҳрида ўтказилган “1st 4NCL Congress Open” турнири ўзбекистонлик халқаро гроссмейстер Жаҳонгир Воҳидов ғалабаси билан якунланди.
Швейцарча тизимда беш турдан иборат турнирда ҳамюртимиз Жеми Хортон, Зивил Саракускин, Тамас Фодор ва Жеймс Жэксонни мағлубиятга учратиб, Люис Мартин билан дуранг ўйнади ва 4,5 очко билан биринчи ўринни эгаллади.
Мини-футбол. Латвиянинг Елгава шаҳрида Ўзбекистон ва Латвия терма жамоалари ўртасида икки ўртоқлик учрашуви ўтказилди. Ҳар икки ўйинда мамлакатимиз мини-футболчилари ғалаба қозонди.
Дастлабки ўйинда терма жамоамиз аъзолари рақибларини 4:2 ҳисобида мағлуб этди. Латвияликлар дарвозасига Даврон Чориев иккита, Константин Свиридов ва Фарҳод Абдумавлонов биттадан тўп киритди.
Иккинчи учрашув ҳам Баҳодир Аҳмедов бошчилигидаги Ўзбекистон терма жамоаси учун омадли бўлди. Артур Юнусов, Даврон Чориев ва Тимур Садиров киритган голлар терма жамоамизнинг 3:2 ҳисобидаги ғалабасини таъминлади.
Б.АЙТМУРОДОВ,
ЎзА мухбири
0
290 
