- O‘zbekiston iqtisodiy axborotnomasi - https://evu.uz/uz -

Yangi korxona ishga tushdi

Posted By vestnik1919_is0g0ljt On 28.05.2015 @ 16:04 In Новости | No Comments

    Президентимизнинг 2013 йил 18 мартдаги “Жиззах” махсус индустриал зонасини барпо этиш тўғрисида”ги фармони асосида ҳудудга тўғридан-тўғри хорижий инвестицияларни кенг жалб этган ҳолда ички ва ташқи бозорда рақобатбардош маҳсулот ишлаб чиқаришни йўлга қўйиш бўйича изчил ишлар олиб борилмоқда.

     “Ўзбекенгилсаноат” давлат акциядорлик компанияси ва хитойлик шериклар ҳамкорлигида барпо этилган корхона замонавий дастгоҳ ва ускуналар билан жиҳозланди. Бу ерда жорий йилда 10 мингта бир неча турдаги замонавий тикув машинасини ишлаб чиқариш мўлжалланмоқда. Корхона тўлиқ қувват билан ишлай бошлагач, ишлаб чиқариш йилига ўн беш мингтага етказилиб, унинг бир қисми хорижга экспорт қилинади.
        Корхонанинг биринчи навбати ишга туширилиши билан 53 янги иш ўрни яратилди. Янги иш ўринларининг асосий қисмини касб-ҳунар коллежларини битирган ёш мутахассислар банд этди.
        – Жиззах иқтисодиёт ва сервис касб-ҳунар коллежини битирганман, – дейди тайёрлов цехи ишчиси Абдулла Асадов. – Янги корхоналар ишга тушаётгани туфайли ўзим танлаган соҳа бўйича иш топиш имкониятига эга бўлдим.
   Айни пайтда корхонада ип ўраш дастгоҳлари, трикотаж маҳсулотларини тикишда қўлланиладиган ярим сунъий иплар, либослар учун безак материаллари ишлаб чиқариш, тикув машиналари учун бутловчи қисмлар тайёрлаш устида иш олиб борилаётир. Бунинг натижасида яна 50 янги иш ўрни яратилади.
      Ҳозирга қадар “Жиззах” махсус индустриал зонаси ва унинг Сирдарё филиалида амалга оширилган 8 лойиҳа туфайли 600 янги иш ўрни яратилди. Мазкур ҳудудда ишлаб чиқариш корхоналари барпо этувчиларга солиқ ва бож тўловлари учун белгиланган имтиёзлар маҳаллий ва хорижий сармоядорларни ўзига жалб этаётир. Янги корхоналарнинг ишга туширилиши минтақадаги бой хомашё ва меҳнат ресурсларидан самарали фойдаланиш, аҳоли бандлигини таъминлаш имкониятини кенгайтирмоқда.
ЎзА мухбири

Article printed from O‘zbekiston iqtisodiy axborotnomasi: https://evu.uz/uz

URL to article: https://evu.uz/uz/novosti/o-zbek-yangi-korxona-ishga-tushdi.html

Copyright © 2015 EVU. All rights reserved.