Маълумки, турли-туман транспорт воситаларини, техника ва асбоб-ускуналарни, кўчмас мулк, иш­лаб чиқариш иншоотлари ва ҳока­золарни узоқ муддатли ижарага олиш лизинг деб аталади. Шунингдек, у анча вақт фойдаланиладиган товарлар экспортини кредитлашнинг ўзига хос шакли, молиявий ижаранинг алоҳида тури ҳисобланади. Пировардида бизнесга сармоя қилишда, инвестиция жарёнини молиявий таъминлашда, тадбиркорликни ривожлантириб, эл-юртни равнақ топтиришда қўл келади. Лизинг хизматлари эса, технологик муносабатларнинг молиявий кў­ринишдаги тезкор ва қулай воситасидир. Аниқроғи, у замонавий юксак технологияларни амалиётга кенг жалб этган ҳолда, иқтисодиёт ва бизнес тараққиётининг гарови вазифасини ўтайди.
     Шу боис ҳозир юртимизда лизинг жозибадорлигини тарғиб қилиш, унинг янги хизмат турларини жорий этиш ва оммалаштириш масалаларига катта эътибор қаратилмоқда. Бу ишга Ўзбекистон лизинг берувчилар уюшмаси ҳам муносиб ҳисса қўша­япти. Натижада соҳада ўзига хос ижобий ўзгаришлар кузатилаяпти. Бунга 2018 йилнинг дастлабки ярмида эришилган натижалар тимсолида яна бир карра ишонч ҳосил қилиш мумкин.
     Ҳозирги кунда республикамизда лизинг хизматларини 126 та лизинг берувчи, шу жумладан 24 та тижорат банки, 102 та лизинг компанияси (шундан 97 таси хусусий). 2018 йилнинг биринчи ярим йиллиги якунларига кўра кўрсатилган хизматларнинг асосий улуши (56,0%) 5 та энг йирик компания («O’zagrolizing», «Uzbek Leasing International A.O.», «O’zavto­sanoat-Leasing», «O’zmeliomashlizing» и «Qurilishmashlizing») ҳиссасига тўғ­ри келади.
     2018 йил 1 июль ҳолатига кўра асосан қуйидагиларни умумий харид қилиш учун йўналтирилган лизинг портфели 3,5 трлн. сўмни ташкил қилди: технологик асбоб-ускуналар (33,3%), қишлоқ хўжалиги техникаси (30,7%), автотранспорт (22,0%) ва тижорат кўчмас мулк объектлари (13,9%). Охирги 5 йилда асбоб-ускуналар лизингига барқарор талаб сақланиб қолмоқда (унинг улуши хизматлар умумий ҳажмида 1,6 марта ошди).