Sorry, this entry is only available in Uzbek. For the sake of viewer convenience, the content is shown below in the alternative language. You may click the link to switch the active language.
«Яшнобод» инновацион технопарки фаолиятининг асосий йўналишлари – кимё технология, материалшунослик, озиқ-овқат саноати, энергия, илмий ривожланиш ва тадқиқот, муҳандислик, экология ва тиббиёт каби соҳаларни қамраб олгани ва бу соҳаларда изчиллик билан олиб борилаётган кенг кўламли ишлар мамлакатимиз иқтисодий салоҳияти юксалишига муносиб ҳисса қўшмоқда.
«Яшнобод» инновацион технопарки фаолияти ҳақида батафсил маълумот олиш учун технопарк раҳбари ШАРИФОВ Шахобиддин Шарифовичга ва шу муассаса резидентларига бир неча блиц-саволлар билан мурожаат қилдик.
– Шахобиддин Шарифович, ўқувчиларимизга технопарк термини, унинг ташкил этилиши хусусида маълумот берсангиз. Оддий сўз билан айтганда, технопарк нима?
– Ўзбекистон Республикаси Президентининг 2017 йил 5 июндаги «Тошкент шаҳрининг Яшнобод туманида инновация технопаркини ташкил қилиш тўғрисида»ги 5068-сонли фармони билан «Яшнобод» инновацион технопарки ташкил этилди.
Технопарк, бу – ҳудудий, илмий, технологик ва инновацион лойиҳаларни амалиётга татбиқ этувчи технологик база ҳисобланади. Технопарк – мураккаб комплекс бўлиб, у илмий-тадқиқот институтлари, саноат объектлари, бизнес марказлари, кўргазма майдонлари, таълим муассасалари, ва шунингдек, хизмат кўрсатиш объектлари: транспорт воситалари, ўтиш йўллари, аҳоли яшайдиган пунктлар ва қўриқлаш хизматини ўз ичига олади.
Ҳозирда технопарклар замонавий илм-фан шаҳарлари – янги технологияларни жорий этиш учун нафақат платформа, балки, ноёб меъморий лойиҳалар амалга ошириладиган макон ҳамдир.
– «Яшнобод» технопарки резидентлари томонидан айнан қайси соҳаларда муваффақиятли ишланмалар ишлаб чиқаришга татбиқ этилмоқда ва самарадорлик қай даражада?
– Ҳозирги кунда «Яшнобод» инновацион технопарки резидентлари жами 53 та инновацион лойиҳалари билан: кимё технологиялари, биотехнологиялар, фармацевтика ва тиббиёт биотехнологиялари, ўсимликларни ҳимоя қилиш воситалари, қишлоқ ҳўжалиги, қурилиш материаллари, ахборот коммуникация технологиялари ва бошқа қатор йўналишларда самарали ишларни амалга оширмоқда.
– Ташкил этилгандан то шу кунгача технопаркда ишлаб чиқарилган маҳсулотлар ҳажми, экспорт салоҳияти ва жалб этилган инвестициялар ҳақида қисқача маълумот берсангиз.
– 2021 йил якуни бўйича, резидентлар томонидан 710 та янги иш ўринлари яратилган бўлиб, 407 млрд. сўмлик маҳсулотлар ишлаб чиқарилган ва мамлакатимиз ички бозорига сотилган. Шу билан бирга 3,8 млн. АҚШ доллари миқдоридаги маҳсулотлар Қозоғистон, Қирғизистон ва Тожикистон давлатларига экспорт қилинган.
Жорий йилнинг I-ярим йиллик натижасига кўра резидентлар томонидан 5,8 млн. АҚШ доллари миқдорида инвестициялар киритилган. Бундан ташқари, Кореянинг «CelluFab Corporation» компанияси Ўзбекистон Республикаси ҳудудида маҳаллий тадбиркор билан қўшма корхона қурилиши учун 1,6 млн. АҚШ доллар миқдорида инвестиция киритган бўлиб, ҳозирда қурилиш ишлари амалга оширилмоқда.
– Технопаркнинг вилоятларда ҳам шахобчалари кўпаяётгани – давр талаби. Бу борадаги ишларда айнан қайси вилоятларни мисол келтира оласиз?
Ўзбекистон Республикаси Президенти Ш.М.Мирзиёевнинг 2021 йил 18-19 февраль кунлари Наманган вилоятига ташрифи давомида ва Халқ депутатлари вилоят Кенгашининг навбатдан ташқари сессиясида берган топшириқлари бўйича «Наманган вилояти Чуст туманини инновацион ҳудудга айлантириш бўйича чора-тадбирлар» дастури ижроси юзасидан Яшнобод инновация технопаркининг экстерриториаллик тамойили асосида «Чуст инновацион технопарки» филиали ташкил қилиниб йил якуни бўйича 10 та инновацион лойиҳага резидентлик мақоми берилди. Ҳозирги кунга келиб мазкур резидентлар томонидан 79 нафар ишчи ўринлари ташкил этилган бўлиб, улар томонидан 236 млн. сўмлик маҳсулотлар ишлаб чиқарилди.
Шунингдек, Президентимизнинг 2021 йил 1-2 июнь кунлари Сурхандарё вилоятига ташрифи давомида берган топшириқлари асосида Олтинсой тумани ҳудудидан 1,2 гектар ер майдони «Яшнобод» инновация технопарки балансига оператив бошқарув ҳуқуқи асосида бепул ўтказилиши юзасидан ҳамкор ташкилотлар ва Сурхандарё вилоят ҳокимлиги билан зарур чора-тадбирлар амалга оширилмоқда. Жумладан, «Яшнобод» инновацион технопаркининг филиали ҳисобланган «Олтинсой ёшлар инновацион ишлаб чиқариш зонаси» мақоми белгиланган тартибда давлат рўйхатидан ўтказилмоқда. «Яшнобод» инновацион технопаркида «Янги илмий ишланмаларни тижоратлаштиришни қўллаб-қувватлаш бизнес-инкубатори» фаолиятининг ташкил этилиши юзасидан технопарк таркибида «Бизнес-инкубатор» фаолиятини мувофиқлаштириш бўлими шакллантирилди ҳамда фаолиятни йўлга қўйиш учун зарурий жиҳозлар билан таъминланди.