Касаба уюшмаси – меҳнатнинг мустаҳкам ҳимояси

 

     Меҳнат – инсон ҳаётининг мазмуни, тараққиётнинг асосий ҳаракатлантирувчи кучи. Ер қаъ­ридан олтин қидирган геолог ҳам, саноат станоклари олдидаги ишчи ҳам, тартиб ва интизом билан меҳнат қилаётган ҳар бир инсон юрт тараққиётининг суянчи ҳи­собланади. Уларнинг ҳаёти, тур­муши, саломатлиги ва орзулари учун қайғуриш – касаба уюшмасининг энг катта масъулиятидир.
     «Ўзбек геология қидирув» акциядорлик жамияти касаба уюшмаси қўмитаси бугун нафақат ишчиларнинг ҳуқуқий манфаатларини ҳимоя қилмоқда, балки уларнинг турмуш даражасини юксалтириш, маданий ва маънавий ҳаётини бойитиш, соғлом авлод тарбиясига ҳисса қўшиш йўлида ҳам изчил ишлар олиб бормоқда.

 

 

     Ҳар бир ишчи учун меҳнат шарт­лари, ҳақ тўлаш, дам олиш ва саломатлигини муҳофаза қилиш масаласи – ҳаётий муҳим омил. Шу боис касаба уюшмаси иш берувчи билан жамоа шартномаси тузиб, ишчи-ходимлар учун ишончли ҳуқуқий ҳи­моя яратган.
     Жамоа шартномасида:
     ● иш ва дам олиш вақтлари қо­нунчиликка мувофиқ тартибга солинган;
     ● ёшлар, аёллар ва ногиронлиги бўлган шахслар учун қўшимча имтиёзлар белгиланган;
     ● зарарли ва хавфли шароитда меҳнат қиладиганлар учун қисқар­тирилган иш вақти, компенсациялар назарда тутилган;
     ● меҳнатга ҳақ тўлашнинг тарифли ва KPI асосидаги тизимлари жорий этилган.
     Шу тариқа ишчи меҳнати арзон баҳоланмайди, унинг ҳар бир меҳна­ти қадрланади. Илғор ишчилар рағ­батлантирилади, бу эса жамоадаги соғлом рақобат муҳитини мустаҳ­камлайди.
     «Ўзбек геология қидирув»да меҳ­нат муҳофазасига алоҳида эътибор қаратилади. Ҳар бир ишчи ўзини хавфсиз ҳис этиши, соғлом муҳит­да ишлаши учун барча чоралар кўрил­ган. Меҳнат муҳофазаси бўйича ташкилий-техник тадбирлар режаси ишлаб чиқилган ва бу борадаги барча чоралар айнан шу мақсадларга йўналтирилади. Ходимлар мунтазам тиббий кўрикдан ўтказилади, зарарли шароитда ишловчиларга даволаш-профилактика озуқалари берилади. Ҳар бир ходим махсус кийим-бош ва шахсий ҳимоя воситалари билан таъминланади. 245 нафар сайланган меҳнат муҳофазаси вакиллари жамоатчилик назоратини амалга ошириб, 36 та талабнома киритган ва уларнинг барчаси ижобий ҳал ­этилган.
     Бу тизимнинг ўзиёқ ишчиларнинг ҳаёти ва соғлиғини қўллаб-қувватлаш йўлида амалий чоралар кўрилаётганидан дарак беради.

 

 

     Жамиятдаги ходимларнинг қа­рийб 36 фоизи – ёшлар. Улар – келажак эгалари, янги ғоялар ташаббус­корлари. Шу боис касаба уюшмаси ёшлар масаласига алоҳида эътибор қаратади.
     Ёшлар учун «Устоз-шогирд» тизими йўлга қўйилган. Ёш мутахассислар учун махсус кенгаш ташкил этил­ган. «Ёш мутахассис» кўрик-танловлари орқали уларнинг салоҳияти намоён этилади. Бу ишлар ёшларнинг меҳнатга бўлган меҳрини оширади, уларнинг келажакда ўз касбининг ҳақиқий устаси бўлиб етишишини таъминлайди.

 

 

 

 

ПОСЛАТЬ ДРУГУ

 ПЕЧАТЬ

Intervyu