Бугун юртимизда қайси соҳага назар солмайлик, инсон қадрини улуғлаш, унинг манфаатларини муносиб ҳимоя қилиш йўлида сезиларли ишлар олиб борилаётганига гувоҳ бўлмоқдамиз. Зотан, Янги Ўзбекистоннинг тараққиёт стратегиясида бош мезон этиб белгиланган «Инсон қадри учун» деган тамойил ҳар бир фуқаронинг ҳаётда ва жамиятда ўз ўрнини топиши, ислоҳотлардан, ўзгаришлардан розилик ҳисси билан яшаши, салоҳияти, лаёқати ва меҳнатига яраша фаровон турмуш кечиришини таъминлашга хизмат қилмоқда.
Ҳар бир фуқаронинг меҳнат, ижтимоий ва иқтисодий ҳуқуқларини кафолатлаш ҳақида сўз борганда, табиийки, касаба уюшмалари фаолияти ҳамда иштирокига тўхталмасликнинг иложи йўқ. Корхона ва ташкилотлардаги ишчи-хизматчиларга қулай меҳнат шароити яратиш ҳамда меҳнат муҳофазаси талабларининг тўлақонли амалга оширилиши устидан жамоатчилик назоратини ўрнатишда ушбу тузилма ҳал қилувчи роль ўйнаши барчамизга яхши маълум.
Уч ярим мингдан зиёд ходим меҳнат қилаётган Бухоро нефтни қайта ишлаш заводида ҳам маъмурият ва касаба уюшма қўмитасининг самарали ижтимоий шерикликни йўлга қўйиши нафақат ишчи-хизматчиларнинг ижтимоий-иқтисодий манфаатларини ҳимоялаш борасида, балки ишлаб чиқариш кўрсаткичлари барқарор ўсиб боришида ҳам муҳим ўрин тутмоқда. Чунки ҳар қандай корхона фаолиятининг самарадорлиги унда ишлаётган ходимлар кайфиятига, мақсад-муддаосига чамбарчас боғлиқ. Агар жамоанинг ҳар бир аъзоси меҳнат ҳуқуқлари поймол қилинмай, аксинча, ижтимоий-иқтисодий манфаатдорлиги ошиб бораётганини, моддий ва маънавий қўллаб-қувватлашни, рағбатни ҳис этса, унинг иш унумдорлиги ҳам шунга яраша юқорилашда давом этади.
Шу маънода Бухоро НҚИЗда ҳам ички ва ташқи бозорда харидоргир маҳсулотлар ишлаб чиқариш кўрсаткичлари йил сайин ошиб, мамлакат иқтисодиёти ривожига салмоқли улуш қўшиб бориши замирида ишчи-хизматчиларимизнинг шижоатли меҳнати ва иштиёқи, интилиши мужассам.
Дарҳақиқат, Бухоро НҚИЗда меҳнаткашларнинг ижтимоий-иқтисодий манфаатлари ва меҳнат соҳасидаги ҳуқуқлари иш берувчи ҳамда касаба уюшма қўмитаси ижтимоий шериклигида мустаҳкам ҳимояга олинган. Ходимлар даромадларини ошириш, уларга қўшимча меҳнат таътиллари бериш, ижтимоий қўллаб-қувватлаш, саломатликларини мустаҳкамлаш масалалари доимий эътиборда бўлиб, фаол ходимларни рағбатлантириб бориш ҳам намунали ташкил этилган.
Ижтимоий шериклик асосида олиб борилган ишлар натижасида сўнгги йилларда ходимларнинг ойлик маошлари изчил ўсиб бормоқда ва ҳозирга қадар бирор марта ҳам иш ҳақини кечиктириш ҳолатларига йўл қўйилмади. Шу билан бирга заводда иш ўринларининг барқарорлиги доимий равишда таъминланиб келинмоқда.
Корхонада ишчи-ходимлар ҳар йили тегишли тартибда тиббий кўрикдан ўтказилиб, шифокор хулосасига кўра саломатлигини тиклаш ва даволанишга эҳтиёжи бўлганларга зарурий ёрдамларни кўрсатиш одат тусини олган. Бундан ташқари кўп минг кишилик жамоанинг ҳар бир аъзоси икки йилда бир марта юртимизнинг исталган сиҳатгоҳида (Ўзбекистондаги барча сиҳатгоҳлар билан шартномамиз бор) дам олиши учун шароит яратиб берилади.
Заводда ишчи-ходимлари махсус кийим-бош, шахсий гигиена воситалари, бепул транспорт ва ҳаттоки бепул сут-қатиқ маҳсулотлари билан ҳам таъминланганини айтиш ўтиш ўринлидир.
Яна бир эътиборли жиҳат шундаки, завод жамоасидаги умумкайфиятни, меҳнат муносабатларида мавжуд муаммо ёки кун тартибига чиққан масалаларни ўрганиб бориш мақсадида ҳар бир цехга ташриф буюриб, ишчи-ходимлар билан юзма-юз мулоқотлар олиб борамиз. Ойлик маошни вақтида олишяптими? Берилаётган маош уларни қониқтирадими? Иш фаолиятида қандай муаммоларга дуч келишмоқда? Мана шу саволлар атрофида ўрганишларимиз натижаси ўлароқ завод маъмуриятига ўз таклиф ва талабларимизни киритамиз. Бунда Ўзбекистон ёшлар иттифоқи Бухоро НҚИЗ бошланғич ташкилоти ҳамда хотин-қизлар қўмитаси бизга яқиндан кўмак беришмоқда.
Баҳодир КАРИМОВ,
Бухоро НҚИЗ касаба уюшма қўмитаси раиси
0
278 
