Бугун юртимизнинг барча ҳудудлари том маънода бунёдкорлик майдонига айланган. Замонавий архитектура талаблари асосида барпо этилаётган ижтимоий-маданий объектлар, турар жойлар, ишлаб чиқариш ва хизмат кўрсатиш нуқталари – буларнинг бари аҳоли учун қулай инфратузилмани яратиб, турмуш фаровонлиги даражасини оширмоқда.
Табиийки, қурилиш ишлари кўлами кенгайиб бораётган бир пайтда пардозлаш материалларига бўлган талаб ҳам тобора ортяпти. Уй-жойлар, жамоат ва саноат биноларини қуришда пардозловчи материаллар сифатида табиий пардозбоп тошлардан қайта ишланган плиталар, меъморий маҳсулотлар кенг қўлланиб келинмоқда.
Эътиборлиси, мамлакатимизда табиий пардозбоп тош (мармар, гранит, габбро ва бошқалар) конлари юздан зиёд бўлиб, уларни қайта ишлаш соҳаси изчил ривожланиб бораётир. Бугунги кунда республика ҳудудида табиий пардозбоп тошларни қайта ишлашга ихтисослашган 200 дан ортиқ корхоналар фаолият юритаётгани бунинг исботидир. Навоий вилоятидаги Gazgan stone масъулияти чекланган жамияти (йиллик ишлаб чиқариш қуввати 280 минг м2 бўлиб, 200 нафардан ортиқ киши иш билан таъминланган) ана шундай йирик лойиҳалардан бири саналади.
Маълумки, Навоий шаҳридан 65 км шимолда, Нурота тизмасининг ғарбий чеккасидаги Ғозғонда энг нодир мармар ва гранит конлари жойлашган. Бу конлардан олинаётган пардозбоп тошлар кўкиш, пушти, оч сариқ, яшил, хуллас, 45 хилдан ортиқ рангга эга ва улар ўта иссиққа ҳамда намга чидамлилиги, ишлов учун қулайлиги билан ғоятда ноёб ҳисобланади. Айниқса, Ғозғон мармарлари қадимдан машҳур бўлиб, Самарқанд ва Бухородаги кўҳна обидаларни қуриш ҳамда безашда ишлатилган.
Яқинда шаҳар мақомини олган Ғозғонни табиий пардозбоп тошлар водийсига қиёслаш мумкин. Gazgan stone бу ерда фаолият кўрсатаётган нисбатан ёш ва иқтисодий салоҳияти юқори, истиқболли корхоналар қаторида эътироф этилади. Унинг энг илғор технологиялар билан жиҳозлангани Европа стандартлари асосида маҳсулотлар ишлаб чиқариш имконини бермоқда.
Gazgan stone мармарлари нисбатан мўрт, яхши силлиқланади, ойнасимон акс беради ва юқори даражада декоратив. Улардан биноларнинг ички ва ташқи томонларини қоплашда ҳамда электротехника маҳсулотлари ишлаб чиқаришда фойдаланилади. Худди шундай, юқори сифатли, чидамли гранитлари ҳам уй-жойлар ва бошқа қурилиш объектларини пардозлашда кенг қўлланилмоқда. Мебеллар учун қопламалар, ванна ва раковиналар, брусчатка, плита… Gazgan stone маҳсулотларидан тайёрланаётган бундай қурилиш ашёлари ички ва ташқи бозорда харидоргир.
Муҳими, Gazgan stone мармар ва гранитлари экологик тозалиги, хизмат қилиш муддати узоқлиги, табиий тузилиши, турли хил шакл ва рангларга эгалиги харидорларни ўзига жалб этмоқда. Бу маҳсулотлардан қурилиш, ободонлаштириш ва йўлсозлик соҳаларида фойдаланилаётгани кўҳна тоштарошлик санъати ҳамда замонавий шаҳарсозлик анъаналарининг уйғунлашувига хизмат қиляпти.
Бугунги кунда Gazgan stone давлат миқёсидаги лойиҳаларда, йирик иншоотлар қурилишида фаол иштирок этмоқда. Унинг маҳсулотлари Марказий Осиё ва Европа бозорларига чиқарилаётир. Эътиборлиси, айни пайтда янги карьерларни ўзлаштириш ва ишлаб чиқаришнинг йил сайин ошириб боришга интилаётган Gazgan stone экспорт географиясини ҳам кенгайтириш, янги иш ўринларини яратиш орқали юртимиз иқтисодиёти ривожига муносиб улуш қўшиш йўлида дадил бормоқда.
0
290 
