Uzbek Overseas Geology Company: чегарасиз геология

 

     2025 йил 25 январда Ўзбекистон Республикаси Вазирлар Маҳкамасининг. «Афғонистондаги минерал-хомашё ресурсларини ҳамкорликда ўзлаштиришга қаратилган истиқболли лойиҳаларни амалга ошириш чора-тадбирлари тўғрисида»ги қарорига мувофиқ «Ўзбек геология қидирув» АЖ ва «Ўзбекгеофизика» АЖ таъсисчилигида хорижий мамлакатларда геология-қидирув ҳамда геологик тадқиқот ишларини амалга оширишга ихтисослашган «Uzbek Overseas Geology Company» МЧЖ ташкил этилди.

 

 

     Ўзбекистонда иқтисодиёт тар­моқлари ва ишлаб чиқариш қувват­ларини зарур хомашё ресурслари билан барқарор таъминлаш мақсадида сўнгги йилларда қатор ислоҳот­лар амалга оширилмоқда. Бу жараён нафақат ички бозор эҳтиёжларини қондиришга, балки қўшни ва хорижий давлатларда геология-қидирув ишларини йўлга қўйиш орқали янги конларни аниқлаш ва уларни саноат миқёсида ўзлаштиришга ҳам хизмат қилади.
     Жамиятнинг асосий мақсади – хо­рижда фойдали қазилмаларни из­лаб топиш билан чекланиб қолмас­дан, ҳар бир жараёнда илғор технология­лар ва инновацион ёндашувларни жорий этиш. Маълумот йиғиш, қиди­рув ишларини олиб бориш, геологик таҳлил, барқарор ривожланиш – буларнинг барчаси компаниянинг кундалик иш услубини белгилайди.

 

 

     «Uzbek Overseas Geology Company» бугунги кунда ўз фаолия­тини Мўғулистон Республикаси, Афғонистон Ислом Амирлиги ва Иордания Ҳошимийлар Қироллиги ҳудудларида амалга оширмоқда. Бу нафақат юртимизнинг геология соҳа­сидаги салоҳиятини намоён этади, балки Ўзбекистоннинг халқаро майдондаги имижини ҳам мустаҳкамлаб иқтисодий ривожланишга ва барқа­рор келажакни яратишга ҳам ўз ҳиссасини қўшади.

 

 

     2024 йил 18 август куни Ўзбекис­тон Республикаси Тоғ-кон саноати ва геология вазирлиги ҳамда Афғо­нистон Кончилик ва нефть вазирлиги ўртасида муҳим келишувлар имзоланди. Ушбу ҳужжатлар икки давлатдаги қидирув ва минерал ресурс­ларни ўзлаштиришга қаратилган ис­тиқболли лойиҳаларни амалга оши­ришни назарда тутади.
     Битимлар доирасида қуйидаги қатор йирик лойиҳалар белгилаб олинди:
     ● Углеводород ресурслари – «Афғон-Тожик» нефт-газли ҳавзасида қидирув ишлари;
     ● Темир рудалари – Бомиён вилоятида захираларни ўрганиш ва техник-иқтисодий асос тайёрлаш;
     ● Мис конлари – Зобул вилоятида истиқболли майдонларда қидирув ишлари ва фойдаланиш асосини ишлаб чиқиш.

 

 

     Афғонистондаги фаолият учун махсус «Ҳаракатлар режаси» тасдиқ­ланди. Шу асосда темир, мис ва углеводород ресурслари бўйича ишлар амалга оширилмоқда. Қобул шаҳ­рида компания филиали очилди. Ундан ташқари «Uzbek Overseas Geology Company» МЧЖ ҳудудий имкониятларни кенгайтириб, Сурхон­дарё вилоятида Афғонистондан олиб келинадиган мармар тошини қайта ишлаш ва уни саноатга тадбиқ қилиш учун ўз филиалини ташкил этди.
     Шу билан бирга темир хомашё ресурсларини ўрганиш ва ўзлаштириш мақсадида қўшма корхона ташкил этиш, JORC халқаро стандартлари асосида тадқиқотлар ўтказиш учун халқаро консалтинг компания­ларини жалб қилиш масалалари келишиб олинди.
     Геология соҳасидаги ҳамкорлик кадрлар тайёрлашни ҳам ўз ичига олади. 2025–2026 ўқув йилидан бошлаб 15 нафар афғонистонлик ёшлар Ўзбекистон Геология фанлари университетида таҳсил олиши режа­лаштирилган.
     Шунингдек, Афғонистоннинг бир қатор вилоятларида жойлашган қум­тошли уран майдонларини ҳамкор­ликда ўрганиш масаласи муҳокама қилинмоқда.
     Бу ҳамкорлик нафақат иқтисодий манфаат, балки минтақавий барқа­рорлик ва стратегик шерикликни ҳам кучайтириб, қўшнилик алоқаларига янги мазмун бағишлайди.

 

 

     «Uzbek Overseas Geology Company» МЧЖнинг Мўғулистондаги ваколатхонаси очилиши муносабати билан мамлакатнинг Ўзбекистондаги Фавқулодда ва Мухтор элчиси Жаноб Дааданхуу Батбаатар расмий ташриф буюрди.
     Учрашувда компаниянинг халқа­ро ҳамкорлик йўналишлари, амалга оширилаётган қўшма лойиҳалар ва истиқболли йўналишлар муҳокама қилинди. Шу асосда геология соҳа­сида ҳамкорлик стратегияси ишлаб чиқилди ва амалий чора-тадбирларни қамраб олган «Йўл харитаси» тасдиқланди.
     Учрашувда қуйидаги масалаларга алоҳида эътибор қаратилди:
     ● мавжуд геологик маълумотлар ва ҳисоботлар асосида майдонлар чегараларини аниқлаш;
     ● қидирув ишлари олиб бориладиган ҳудудларни белгилаш;
     ● янги истиқболли майдонларни илмий асосда тавсия қилиш;
     ● рухсат бериш тартибини муво­фиқлаштириш.
     Бу ишлар 2025 йил ноябр ойи охирига қадар босқичма-босқич амал­га оширилиши режалашти­рилган.
     Компания мутахассислари геологик маълумотларни чуқур таҳлил қи­лиш, минерал ресурслар ва истиқ­болли майдонларни аниқлашга қа­ратилган бир қатор ишларни олиб боришмоқда.

 

 

     Учрашув доирасида маълумотлар алмашиш ва қўшма тадқиқотлар ўтказиш бўйича келишувга ҳам эришилди. Бу нафақат самарали қидирув ишларини йўлга қўйиш, балки икки давлат мутахассислари учун янги им­кониятлар эшигини очади.
     Элчи Жаноб Дааданхуу Батбаа­тарнинг ташрифи геология соҳасида­ги ҳамкорликнинг иқтисодий ёки саноат йўналишидан ташқари, сиёсий ва маданий аҳамиятга ҳам эга эканини кўрсатди. Геология – бу фа­қат конлар эмас, балки илм, технология ва дипломатия кўприги ҳамдир.

 

 

     2025 йил 16–22 сентябрь кунлари Ўзбекистон Республикаси Тоғ-кон са­ноати ва геология вазири ўринбосари Р. Юсупов раҳбарлигидаги делегация Амман шаҳрида бўлиб, Иордания Энергетика ва минерал ресурс­лар вазирлиги ва бир қатор компаниялар билан музокаралар ўтказди.
     Сафар доирасида ҳамкорлик дас­тури ва меморандум имзоланди. Уран ва бошқа металларга оид ис­тиқболли майдонлар ўрганилиб, қўш­ма ишчи гуруҳ тузилди. Бу келишув икки мамлакат геология соҳаси­даги ҳамкорлик имкониятларини янада кенгайтиради.
     Хулоса қилиб айтганда «Uzbek Overseas Geology Company» – бу Ўз­бекистоннинг геология соҳасидаги янги қиёфаси. Компания халқаро ло­йиҳалари орқали нафақат иқтисодий ўсишга ҳисса қўшади, балки дипломатик ишонч кўпригини ҳам барпо этмоқда.

 

ПОСЛАТЬ ДРУГУ

 ПЕЧАТЬ

Intervyu