Иқтисодий ислоҳотлар натижасида мамлакатимизнинг экспорт салоҳияти юксалиб, «Made in Uzbekistan» ёрлиғи туширилган маҳсулотлар жаҳон бозорида кенг ўрин эгалламоқда. Жумладан, Ўзбекистон Республикаси Ташқи иқтисодий фаолият миллий банки ҳузуридаги Кичик бизнес ва хусусий тадбиркорлик субъектларининг экспортини қўллаб-қувватлаш жамғармаси уларнинг товар ва хизматларини ташқи бозорга чиқаришда яқиндан кўмаклашмоқда.
Жамғарма жорий йилнинг биринчи чораги якуни бўйича 627 тадбиркорлик субъектига маҳсулот ва хизматларни экспорт қилишда ташкилий, ҳуқуқий ва молиявий хизматлар кўрсатди. Натижада умумий қиймати 642 миллион АҚШ долларига тенг экспорт шартномалари имзоланиб, улар доирасида 280 тадбиркор 270 миллион долларлик маҳсулотларини экспорт қилди. Жорий йилнинг биринчи чорагида ушбу жамғарма томонидан элликдан ортиқ тадбиркорлик субъектларига Германия, Россия ва Қозоғистонда бўлиб ўтган халқаро кўргазма ва ярмаркаларда иштирок этишда ёрдам кўрсатилди.
Бу тадбирларда 117,8 миллион долларлик экспорт келишувлари имзоланди. Жамғарма томонидан 2017 йилда 374 миллион долларлик 776 лойиҳани амалга ошириш мақсадида тадбиркорларимизга бизнес-режа ва бошқа ҳужжатларни тайёрлаш ва банкка топширишда кўмаклашиш режалаштирилган.