Бугунги кунда жамиятимиз ривожини техник тараққиётсиз, замонавий қурилмаларсиз тасаввур этиб бўлмайди. Инсонлар оғирини енгил, узоғини яқин қилаётган ақлли қурилмалар аллақачон ҳаёт тарзимизнинг ажралмас бўлагига айланган. Бу борада ҳукуматимиз томонидан ёшларимизнинг хорижий давлатларда тажрибаларини ошириши учун қилинаётган саъй-ҳаракатлар, ўзлаштирилган амалий кўникмалар юртимиз ишлаб чиқариш корхоналарига татбиқ қилинаётгани ўз самарасини бермоқда. Ёшларнинг фундаментал ғоялар ва инновацион янгиликлари эса ҳукуматимиз томонидан муносиб рағбатлантирилмоқда.
Хусусан, Инновацион ривожланиш вазирлиги томонидан 2018-2020 йилларда илмий-тадқиқот ва олий таълим ташкилотлари учун 123 турдаги лаборатория асбоб-ускуналарининг харид қилиниши бўйича Илм-фанни молиялаштириш ва инновацияларни қўллаб-қувватлаш жамғармаси маблағлари ҳисобидан 96,5 млрд. сўм молиялаштирилгани ҳам юқоридаги сўзимизнинг тасдиғидир. 2021 йил якунига қадар илмий-тадқиқот ташкилотлари учун яна 206 турдаги 82,9 млрд. сўмлик лаборатория асбоб-ускуналари харид қилинади.
Харид қилинган илмий лаборатория асбоб-ускуналарида ишлаш методикасини ўзлаштириш мақсадида 20 нафар илмий ходимлар етакчи хорижий илмий ташкилотларга қисқа муддатли илмий стажировкаларга юборилди. Ёш олимларнинг қисқа муддатли илмий стажировкаларини ташкил этиш бўйича 2019-2020 йилларда 231 нафар ёш тадқиқотчилар, 21 та хорижий давлатларга (АҚШ, Россия, Буюк Британия, Германия ва бошқалар) юборилди.
Мазкур мақсадларга Илм-фанни молиялаштириш ва инновацияларни қўллаб-қувватлаш жамғармасидан 6,1 млрд. сўм сарфланди. 2021 йилнинг 9 ойлигида ёш олимларнинг қисқа муддатли илмий стажировкаларини ташкил этиш мақсадида 5 маротаба танловлар ўтказилди. Шунингдек, илмий-тадқиқот ва олий таълим ташкилотларидан қисқа муддатли илмий стажировкаларга бориш учун тавсия этилган 440 нафар номзодларнинг маълумот (ҳужжат)лари кўриб чиқилиб, саралаш танловлари ўтказилди. 37 нафар ёш олимларни 6 та хорижий давлатларга илмий стажировкаларга юбориш учун 1,9 млрд. сўм молиялаштирилди. Шу билан бирга 224 нафар ғолиб номзодларни пандемия шароитида давлатлараро транспорт (авиа) қатновлари йўлга қўйилиши билан ҳамда эпидемиологик шароитлар ҳисобга олиниб, мақбул шароитларда бориб-қайтишлари таъминланади.
Ёш олимларни етакчи хорижий илмий ташкилотларга қисқа муддатли илмий стажировкаларга юбориш доирасида Инновацион ривожланиш вазирлиги ва Илм-фанни молиялаштириш ва инновацияларни қўллаб-қувватлаш жамғармаси томонидан амалга оширилаётган ишлар ва истиқболдаги режаларни ёшларга етказиш мақсадида давра суҳбати ва вебинарлар мунтазам ўтказилмоқда.
Сарвар ТОХИРОВ,
Илмий стажировкаларни ва лаборатория асбоб-ускуналари харидини ташкил этиш бўлими бошлиғи
0
313 
