Ўзбекистон бугун ҳар соҳада жадал ривожланиш йўлидан бормоқда. Жамиятимизда сиёсий фаоллик ортиб, барча соҳаларда чуқур ислоҳотлар амалга оширилмоқда. Инсон ҳуқуқларини ҳимоя қилиш масалалари бўйича миллий ва халқаро нодавлат ташкилотлари билан очиқ мулоқот фаоллашмоқда ҳамда мустаҳкамланмоқда.
Инчунун, келажагимиз эгалари – ёшларни маънавий етук ва жисмонан соғлом, ватанпарвар ва фидойи этиб тарбиялаш, уларнинг ҳуқуқ ва манфаатларини ҳимоя қилиш борасида давомли ва кенг кўламли ишлар амалга оширилмоқда.
Жумладан, Президентимиз ташаббуси билан юртимиздаги иқтидорли ва истеъдодли ёшларни қўллаб-қувватлаш ҳамда рағбатлантириш мақсадида Инновацион ривожланиш вазирлиги ҳузурида Ёшлар академиясининг ташкил этилиши, унга мамлакатимизнинг иқтидорли ёшлари қамраб олиниши бу йўлдаги ишларни янги босқичга кўтарди. Ёшлар академиясининг нафақат юртимиз иқтидорли ёшларини, балки чет мамлакатларда ўқиб, меҳнат қилаётган йигит-қизларимиз билан ҳам алоқа ўрнатиб, уларнинг муаммо ва таклифларини ўрганаётгани эътиборга молик.
Ўзбекистон Республикаси Инновацион ривожланиш вазирлиги ҳузуридаги Ёшлар академияси 2019 йилнинг сентябрь ойида ташкил этилган бўлиб, унинг асосий мақсади ёшларнинг ижодий, интеллектуал ва тадбиркорлик салоҳиятини рўёбга чиқариш, инновацион ғоялар, лойиҳалар ва технологияларни ишлаб чиқаришга жорий қилиш, иқтидорли талабалар, ёш олимлар ва тадбиркорларнинг инновацион фаолиятини рағбатлантириш, илм-фан, таълим ва ишлаб чиқариш интеграциясини кучайтириш учун зарур шарт-шароитлар яратишдан иборат.
Ҳозирга қадар Ёшлар академияси томонидан республиканинг барча ҳудудларида 200 дан ортиқ семинар-тренинглар, давра суҳбатлари, очиқ мулоқотлар ҳамда тарғибот тадбирлари олиб борилди, 10 дан зиёд ҳамкорлик меморандумлари имзоланди, шунингдек, 25 га яқин танловлар ташкил этилди. Жумладан, ёш олимларнинг амалий ва инновацион лойиҳаларини қўллаб-қувватлаш мақсадида Ёшлар академияси томонидан 30,2 млрд. сўмлик амалий ва инновацион лойиҳалар танлови эълон қилинди. Илмий фаолиятга оид давлат дастурлари доирасида илмий-тадқиқот ишларига давлат буюртмаси талабларига мувофиқ ёш олимларнинг амалий ва инновацион лойиҳалари танловида 10 та фан йўналиши бўйича умумий 30 та илмий лойиҳа мавзуларига жами 69 та лойиҳа келиб тушган.
Президентимиз ташаббуслари билан 2020 йил устувор фан йўналишлари ҳисобланган математика, геология, кимё ва биология фанлари бўйича «Scopus» халқаро илмий нашрлар маълумотлар базасида энг юқори Хирш индексига эга 40 ёшгача бўлган олимларга Ёшлар академияси томонидан 100 млн. сўм миқдорида мукофот пуллари берилгани ҳам ёшларни илм-фанга жалб этиш йўлидаги эзгу ҳаракатлардан биридир.
Вазирлар Маҳкамасининг «Инновацион ғоялар етакчиси» кўкрак нишонини таъсис этиш чора-тадбирлари тўғрисида»ги қарори билан «Инновацион ғоялар етакчиси» кўкрак нишони таъсис этилган. Ҳар йили республика миқёсида лойиҳалар кўриб чиқилади, энг муносиб 14 нафар номзод «Инновацион ғоялар етакчиси» кўкрак нишони ғолиби деб топилиб, улар «InnoWeek» халқаро инновацион ғоялар ҳафталигида кўкрак нишони ҳамда гувоҳномалари ва эсдалик совғалари билан тақдирланади.
Ўзбекистон Республикасида Covid-19 пандемияси оқибатларини юмшатиш мақсадида Инновацион ривожланиш вазирлиги, Бирлашган Миллатлар Ташкилоти Тараққиёт Дастурининг Ўзбекистондаги ваколатхонаси, Ўзбекистон Ёшлар иттифоқи билан ҳамкорликда 2020 йил апрель-май ойларида уч босқичли мукофот жамғармаси 500 млн. бўлган «Covid-19 Challenge 2020» инновацион воситалар ва ечимлар онлайн танлови ташкил этилди. Ушбу танлов 5 та йўналишда ташкил этилган бўлиб, танловга 600 дан ортиқ лойиҳалар қабул қилинди ҳамда махсус ташкил этилган комиссия томонидан танловнинг якуний босқичида 5 та энг истиқболли лойиҳалар танлаб олиниб, ҳар бирига қайтарилмаслик шарти билан 100 млн. сўм грант маблағлари ажратилди.
«InnoWeek.Uz-2020» доирасида ташкил этилган биринчи «World youth innovation forum – 2020» – Халқаро ёшлар инновация форуми доирасида мукофот жамғармаси 300 млн. сўмга тенг «Энг яхши лойиҳалар» танлови ташкил этилди. Мазкур танловга 5 та йўналиш бўйича 115 та лойиҳа келиб тушди. 2021 йил 18 январда саралаш натижаларига кўра 15 нафар ғолиб Инновацион ривожланиш вазирлиги ҳузуридаги Ёшлар академияси маблағлари ҳисобидан тақдирланди.
«Учинчи ренессанс – ёшлар нигоҳида» номли доимий республика танлови ташкил этилди. Танловнинг 3 йўналиши бўйича республика якуний босқичи биттадан ғолиблари ўзлари таклиф этан лойиҳаларни амалга ошириш мақсадида 50 миллион сўм грант пуллари билан тақдирланди.