Телевидение соҳаси нафақат йиллар давомида, балки соатма-соат ўзгаришлар ичида тараққий этадиган соҳа. Қайд этиш жоизки, Янги Ўзбекистон ислоҳотлари очиқлик ва ошкоралик, энг муҳими, инсон манфаатларини таъминлаш тамойили устига қурилган бўлиб, бу борада ҳурматли Юртбошимиз томонидан ҳар доим жамият ҳаёт тарзида ахборот ва медиа макон соҳасидаги эркин сўз қадр-қимматини англаш ва муносиб муносабатда бўлиш ташаббуси билдириб келинади. Энг муҳими, ўз иқлим ва жўғрофий имкониятларига кўра алоҳида хусусиятли ҳудудлар ҳаёти ва ўша ҳудудларда ҳаёт кечираётган аҳоли ташаббуслари ҳақида маҳалий оммавий ахборот воситаларида фаол ёритилиши бугунги ислоҳотларнинг мазмун-моҳияти билан тўла мос келади.
Мазкур жараёнда маҳаллий оммавий ахборот воситалари фаолиятини қўллаб-қувватлаш ва ривожлантириш нафақат давлатимиздаги ижтимоий сиёсатни фаол тарғиб этишдаги муаммоларни ҳал этиш, балки ўта тезкор ахборот алмашинув замонида аҳолининг сифатли ва тезкор, асосийси, тўғри маълумотлардан бохабарлик эҳтиёжини қондиришда муҳим аҳамиятга эга.
Шу маънода, Жиззах вилоят телерадиокомпанияси, гарчи 90-йилларнинг иккинчи ярмида ташкил этилган бўлса-да, замонавий технологиялар ёрдамида фаолият кўрсатишидаги жузъий камчиликлар бугунги замон ахборот аудиторияси эҳтиёжини қоплаш учун етарли бўлмагани ҳам бор гап.
Яқин 5 йил ичида Жиззах вилоят ТРК телевидение ва радио муҳарририятларида эфир соатларининг кескин оширилгани ҳамда шунга яраша теле- ва радиодастурлар эфир мундарижасида аҳоли мурожаатлари ва жамоатчилик назорати нуқтаи назари акс этаётгани – бу энди чин маънода янги ислоҳотлар тўлқинида кечаётган ўзгаришларнинг таъсир кучидан дарак беради.
Юртбошимизнинг Жиззах вилоятига ташрифлари ҳар доим ҳам вилоятимиз аҳли учун орзиқиб кутилган воқеа бўлиб тарихда қолган. Сабаби, ҳар бир ташриф доирасида Давлатимиз раҳбари муайян манзилларни кўздан кечирса ҳам, вилоят фаоллари, кенг жамоатчилик ва айниқса, ёшлар билан учрашиб, фикр алмашадилар. Энг муҳими, бирор бир соҳа у кишининг назаридан четда қолмайди.
Ишчи ташрифлардан бирида, аниқроғи 2018 йилда Жиззахга келганларида иқтисодиётнинг кўплаб соҳа ва тармоқларида амалга оширилаётган лойиҳалар билан танишиш асносида Юртбошимиз Жиззах вилоят телерадиокомпанияси фаолиятини техник-технологик жиҳатдан қўллаб-қувватлаш ташаббусини билдирдилар. Ва айни мана шу ташаббус ҳосиласи сифатида 2021 йилда Жиззах вилоят телерадиокомпанияси учун янги телестудия биноси қуриб, фойдаланишга топширилди.
Бугунги кунга келиб эса, Ўзбекистон Республикаси Президентининг 2022 йил 30 декабрдаги «2023 – 2025 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги қарорига мувофиқ Жиззах вилоят телерадиокомпаниясини замонавий студия тасвир – монтаж техникаси ва кўчма телевизион станция билан жиҳозлаш тадбирлари ниҳоясига етяпти. Рақамлар тили билан айтганда, жами қиймати 68 миллиард сўмлик студия тасвир ва монтаж техникаси теле- ва радиодастурлар ишлаб чиқариш жараёнига кириб келишни бошлади.
Яқин икки ой ичида теле- ва радиодастурларнинг эфир сифати борасида туб ўзгаришлар кутилаётган шароитда айтмоқчиманки, агар бугун кириб келиши бошланган янги техникалар тўлақонли татбиқ этилса, телеэфир соатимиз ҳозирги 18 соатдан 24 соатга етказилади. Радиода ҳам кун-тун ахборот алмашинуви ва мулоқот йўлга қўйилади. Айни мана шу тезкорликни, тан олиш керакки, яқин 3 йилда маҳаллий телеканаллар фаолиятида тасаввур қилиш, муҳими, юқори сифатни таъминлашни ўйлашнинг ўзи эҳтмолдан йироқ нарса эди.
Энди эса жойлардан жонли репортажларни кун давомида бериб бориш, долзарб мавзулардаги студия очиқ мулоқотларини ҳар куни ташкил этиш имконияти яратиб берилмоқда. Бу эса, шубҳасиз, Жиззах вилоят телерадиокомпанияси фаолияти учун ўта муҳим мезон бўлади. Биз 2024 йилдаги ижодий режамизни тузишда мана шу жиҳатни эътиборга олган ҳолда жамоатчилик назорати сифатини оширишга, бугунги Янги Ўзбекистон ислоҳотлари моҳиятини халқимиз эътиборига етказишга хизмат қиладиган янги лойиҳаларни тақдим этишга катта ўрин берганмиз. Мазкур жараёнда иқтидорли ёшларнинг ижодий ташаббусларини қўллаб-қувватлаш, устоз-шогирд анъаналарига таянган ҳолда истеъдоларни кашф этишга доим тайёрмиз.
0
297 
