Бугунги кунда дунёда бир томондан глобал иқлим ўзгаришлари ва қурғоқчилик, бошқа бир томондан эса пандемия ва у келтириб чиқараётган асоратлар, геосиёсий майдондаги тафовут, беқарорлик инсониятни яна бир жиддий муаммога – очарчиликка юзма-юз қилиши жаҳон минбарларида ташвиш билан айтилмоқда. Англаганимиздек, озиқ-овқат хавфсизлиги ҳар бир давлат учун тобора ҳаёт-мамот масаласига айланиб боряпти.
Шундай шароитда юртимизда аҳолини озиқ-овқат маҳсулотлари билан таъминлашни кафолатлаш, бунинг учун деҳқончиликдаги бой тажрибаларимиз, мавжуд салоҳият ва имкониятларимиздан самарали фойдаланиш, қишлоқ хўжалиги соҳасига инновацион, янгича ёндашувларни жорий этиш чора-тадбирлари жадал олиб борилмоқда. Ушбу жараёнда молия институтлари, жумладан, мамлакатимиз банк тизимида алоҳида ўринга эга «Агробанк» акциядорлик тижорат банки ҳам замон талабларига ҳамоҳанг равишда истиқболли лойиҳаларни амалиётга йўналтирмоқда.
Хусусан, «Агробанк» АТБ томонидан амалга оширилган кенг кўламли трансформация жараёнлари натижасида банк экотизими яратилди. Шунинг натижасида хизматлар кўлами ошиб, сифат жиҳатдан янги босқичга кўтарилмоқда. Давлатимиз раҳбарининг 2021 йил 16 декабрда қабул қилинган «Томорқадан фойдаланиш самарадорлигини ошириш, шунингдек, аҳолининг тадбиркорлик ташаббусларини молиявий қўллаб-қувватлаш бўйича қўшимча чора-тадбирлари тўғрисидаги» қарори бунда муҳим дастуриламал бўлаётир.
Ушбу ҳужжат ижроси доирасида «Агробанк» жамоаси томорқа эгаларига қулайлик яратиш мақсадида янги «AgroZamin O’zimizniki» онлайн платформасини ишлаб чиқди ва платформа жорий йилнинг 1 апрелидан ишга туширилди.
Бу платформа орқали томорқа ер эгасига ўз маҳсулотини онлайн сотиш, уруғ, кўчат, минерал ўғитларни сотиб олиш, видео қўлланмалар, онлайн маслаҳат олиш қулайликлари яратилди. Шунингдек, мазкур платформада маҳсулот ва хизматларни онлайн тарзда «Агромарказ»га буюртма бериш ҳам мумкин.
Дарвоқе, «Агробанк» молиявий кўмагида республика бўйича томорқа ер эгалари, деҳқон ва фермер хўжаликлари ҳамда қишлоқ хўжалигининг бошқа бўғинларига «Бир дарча» тамойили асосида хизмат кўрсатиш учун ҳудуд ихтисослашувидан келиб чиқиб агромарказлар ташкил этилмоқда.
Мазкур марказларда қишлоқ хўжалиги маҳсулотлари етиштирувчиларига «ерга ишлов бериб, уруғ қадашдан то тайёр маҳсулот ишлаб чиқариш»гача бўлган занжирли тизимни қамраб олган хизматлар кўрсатилиши эътирофга лойиқ жиҳатдир.
Агромарказларда:
● агроном, ветеринар, ўсимликларни ҳимоя қилиш, хизмат кўрсатувчи мобиль гуруҳлар, томчилатиб суғориш, паррандачилик, қуёнчилик, боғдорчилик ва узумчилик йўналишида консалтинг (маслаҳат) хизмати;
● техника хизматлари, минерал ўғитлар етказиб бериш, сунъий уруғлантириш, транспорт хизматлари;
● етиштирилган маҳсулотларни сотиб олиш, қайта ишлаш ва сотиш тизими мавжуд.
Кўриниб турибдики, «Агробанк» ташаббускорлигида ҳудудларда ташкил этилаётган агромарказлар деҳқонларимизга, фермер хўжаликлари ҳамда кластерларга катта ёрдамчи бўлиб, улар хизматидан жисмоний ва юридик шахслар кенг фойдаланиш имкониятига эга. Бу эса қишлоқ хўжалиги маҳсулотлари етиштириш ҳажмини ошириш, экспортни ривожлантириш, асосийси, халқимиз турмуш фаровонлигига хизмат қилмоғи муқаррар.
0
290 
