Юртимизда олиб борилаётган иқтисодий ислоҳотлар самараси ўлароқ, бугун барча соҳалар жадал ривожланмоқда. Шулардан бири, тўқимачилик соҳаси бўлиб, давлатимиз томонидан берилаётган эътибор ва йўлга қўйилган ишчан тизим бугунга келиб ижобий самара бермоқда. Қуйида айтишга арзигулик натижалар билан чет эллик ҳамкорлар эътирофига тушган «Textile Technologies Group» МЧЖ хорижий корхонаси ҳақида тўхталамиз.
Яратилган қулай шароитлардан фойдаланиб, 2010 йилнинг 24 мартида ташкил қилинган ушбу корхонанинг асосий фаолияти тўқимачилик ва трикотаж саноати учун ип, хом ва тайёр ип газламалар, техник газламаларни қўшган ҳолда момиқ, пахтали ватин иплар ишлаб чиқаришдан иборат. Корхонада 12 хил турдаги калава иплари ишлаб чиқарилади.
Вазирлар Маҳкамасининг «Пахта-тўқимачилик ишлаб чиқаришларини янада ривожлантиришга доир қўшимча чора-тадбирлар тўғрисида»ги 744-сонли ва «Республика ҳудудларида пахта-тўқимачилик ишлаб чиқаришини жорий этиш механизмларини янада кенгайтириш чора-тадбирлари тўғрисида»ги 914-сонли қарорларига асосан «Тextile Technologies Group» МЧЖ хорижий корхонаси муассислигида Тошкент вилоятининг Чиноз, Бекобод ва Бўка туманларининг пахта ва ғалла майдонлари бириктирилиб, жами учта пахта-тўқимачилик кластерларини таъсис этди.
Лойиҳаларни амалга оширишга жами 152,8 млн. АҚШ доллари миқдорида инвестиция киритилиб, жумладан:
● қиймати 50 млн. АҚШ долларига тенг бўлган, йиллик қуввати 6000 тонна ип-калава ишлаб чиқаришга мўлжалланган, замонавий ип-йигирув фабрикаси қуриб ишга туширилди;
● қиймати 65,2 млн. долларига тенг бўлган юқори унумли қишлоқ хўжалиги техникалари, жумладан 220 та «CASE» ер ҳайдов тракторлари, 79 та «JOHN DEERE» ва «CASE» пахта териш машиналари, ҳамда 500 дан ортиқ техника ва механизмлари бевосита хорижий молия институтлари томонидан молиялаштирилиб, «UZCASEAGROLEASING» ҚК МЧЖ орқали лизинг шартлари ҳамда «JOHN DEERE FINANS» компанияси томонидан кредит шартлари асосида сотиб олиниши амалга оширилди.
2023-2024 йиллар давомида қўшимча равишда 100 дона юқори унумли қишлоқ хўжалиги техникаларини харид қилиш асосий Дастурга киритилган;
● Юқоричирчиқ туманида қиймати 19,6 млн. АҚШ долларига тенг бўлган, йилига 6,6 млн дона Пробиотик капсулалар ишлаб чиқаришга ихтисослаштирилган «Салибрус ВИТА» фармакологик корхонаси ишга туширилмоқда. Корхонада 200 та иш ўрини яратилади;
● Оҳангарон туманида йилига 7 минг тонна нотўқима мато ишлаб чиқаришга мўлжалланган, қиймати 8,6 млн. АҚШ долларига тенг «Спалмент» корхонаси барпо этиш мақсадида янги технологиялар асосида тайёрланган асбоб-ускуналар келтирилиб, қурилиш, ўрнатиш ишлари жадаллик билан олиб борилмоқда. Корхонада 350 та иш ўрни яратилади;
● етиштирилган пахта хом ашёсини корхонада қайта ишлашни йўлга қўйиш мақсадида, Чиноз туманида умумий қиймати 4,5 млн. АҚШ долларига тенг бўлган янги, замонавий пахтани қайта ишлаш заводи қурилиб, ишга туширилди ва Бекобод туманида умумий қиймати 3,9 млн. АҚШ долларига тенг бўлган пахтани қайта ишлаш корхонаси сотиб олиниб, модернизация қилинди. Натижада Чиноз туманида 229 нафар ва Бекобод туманида 235 нафар маҳаллий аҳоли доимий иш билан таъминланди;
● 2020 йил январда кластерларга механизация хизматлари кўрсатиш сифатини ошириш мақсадида Чиноз туманида қиймати 1 млн. АҚШ долларига тенг бўлган замонавий, барча қулайлик ва техникаларга эга механизациялашган машина – трактор парки ва илмий-ўқув маркази фаолиятини бошлади.
Кластерларимизга бириктирилган ер майдонларининг 2 700 гектарига ишлов берилиши натижасида қайта ўзлаштирилди. Натижада, Чиноз туманида юқори ҳосил олишга эришилиб, режа бўйича 20 300,0 тонна пахта хом ашёси етиштириш белгиланган бўлсада, амалда 22 467 тонна юқори сифатли пахта хом ашёси етиштирилди ва режа 110,7 % га бажарилди.
0
293 
