Жорий ойда Давлат солиқ қўмитаси кўчмас мулк ижара шартномаларини давлат солиқ хизмати органларида ҳисобга қўйиш интерактив хизмати — E-ijara дастурини ишга туширди.
Қўмита маълумотларига кўра, 2022 йилнинг 1 январидан амалиётга тўлиқ жорий қилиш режалаштирилаётган ушбу хизмат
ijara.soliq.uz манзилида синовдан ўтказилмоқда.
E-ijara дастури амалиётга жорий қилингач:
– юридик шахсларни қайта рўйхатдан ўтказиш ариза берувчининг давлат кадастр маълумотлари базасида кўчмас мулкка эга бўлган, ижара ёки кўчмас мулкдан текин фойдаланиш шартномаси солиқ органларида ҳисобга қўйилган тақдирда амалга оширилади;
– янги ташкил этилаётган юридик шахсларни рўйхатдан ўтказиш ариза берувчининг давлат кадастр маълумотлари базасида кўчмас мулкка эгалиги ёки ижарага берувчининг кафолат хати асосида солиқ органларида ҳисобга қўйилган кўчмас мулк ижара маълумотлари мавжуд бўлганда амалга оширилади;
– юридик шахслар давлат рўйхатидан ўтган санадан бошлаб ўн кун муддатда аризада кўрсатилган ёҳуд бошқа кўчмас мулк ижара шартномасини давлат солиқ хизмати органларида ҳисобга қўймаса юридик шахс манзилда йўқ деб эътироф этилади;
– ижарага олинган ёки бепул фойдаланилаётган кўчмас мулк объектида сақланаётган товар-моддий захиралар ушбу кўчмас мулк объектининг ижара шартномаси ҳисобга қўйилган тақдирдагина ҳақиқий деб тан олинади ва солиққа тортиш мақсадларида инвентаризациядан ўтказилади.
E-ijara солиқ хизматлари кўрсатишда инсон омилини қисқартириш орқали коррупция ҳолатларини бартараф этиш, бозорда тенг рақобат муҳитини яратиш, ҳалол тадбиркорликни қўллаб-қувватлаш ҳамда яширин иқтисодиётнинг олдини олишга хизмат қилади.
0
57 
