Яқинда Москва шаҳрида бўлиб ўтган “ПродЭкспо — 2017” халқаро кўргазмаси доирасида Ўзбекистон мева-сабзавот маҳсулотларини янги бозорларга, хусусан, Мўғулистон ва Вьетнамга етказиб бериш бўйича келишув имзоланди. Энди ушбу мамлакатларга сархил ва қуритилган мева, полиз ҳамда дуккакли маҳсулотлар экспорт қилинади. Кўргазма давомида Хитойнинг «Honkong Line Trading CO LTD», Қозоғистоннинг «Метро Кэш Энд Керри», Беларуснинг «Евроторг», Россиянинг «Челни-хлеб», «СПАР Тула», Мўғулистоннинг «Happy Fruits» ва бошқа компаниялар вакиллари билан музокаралар ўтказилиб, тадбирлар якунида жами 74 миллион АҚШ долларилик сархил ҳамда қайта ишланган мева-сабзавот маҳсулотлар савдоси бўйича битим имзоланди.Германия пойтахтида бўлиб ўтган «Яшил ҳафта — 2017» ярмаркаси доирасида эса 151,1 миллион долларлик шартномалар тузилди. Қишлоқ хўжалиги, чорвачилик, боғдорчилик ва озиқ-овқат саноатининг энг сўнгги ютуқлари намойиш этилган йирик форумда 66 мамлакатнинг 1,6 мингдан ортиқ компания ҳамда фермер хўжаликлари қамраб олинди. Унда Ўзбекистон компаниялари ҳам муносиб иштирок этди. Нуфузли халқаро ярмаркада «Ўзбекозиқовқатхолдинг», «Ўзвиносаноат-холдинг» холдинг компаниялари, «Ўзагроэкспорт» АЖ каби ташқи савдо тузилмалари, республиканинг турли ҳудудларидан фермер хўжаликлари Ўзбекистон агросаноати салоҳиятини намойиш этди. Ярмаркада шунингдек, Германия, Буюк Британия, Латвия, Жанубий Корея, Ҳиндистон, Хитой, БАА ва Туркия вакиллари билан мева-сабзавот маҳсулотларини экспорт қилиш бўйича битимлар имзоланди.
0
479 
