Ўзбекистон Республикаси Олий Мажлиси Қонунчилик палатасининг Аграр ва сув хўжалиги масалалари қўмитаси соҳа барқарор ривожланишида ер ресурсларини сақлаш ва улардан самарали фойдаланишнинг аҳамиятига бағишланган давра суҳбати ўтказди. Унда Олий Мажлис Қонунчилик палатаси депутатлари, Қишлоқ ва сув хўжалиги вазирлиги, «Ергеодезкадастр» давлат қўмитаси мутахассислари, Тошкент давлат аграр университети, Тошкент давлат юридик университети, Тошкент ирригация ва мелиорация институти професссор-ўқитувчилари иштирок этди. 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясининг учинчи йўналишида бу борадаги ишларга алоҳида эътибор қаратилган бўлиб, жумладан пахта ва бошоқли дон майдонларини қисқартириш, бўшаган ерларга картошка, сабзавот, озуқа ва ёғ олинадиган экинлар экиш, янги интенсив боғ ва узумзорлар барпо этиш ҳисобига экин майдонларини янада оптималлаштириш каби чора-тадбирлар белгиланган. Бугун тупроқ унумдорлигини сақлаш масаласи ўткир муаммо экан, унинг қонуний асосларини чуқур таҳлил этиш, қонун ҳужжатларини такомиллаштириш зарурати юзага келди. Давра суҳбатида соҳанинг барқарор ривожида ер ресурсларининг аҳамияти, муҳофазаси, неъматдан оқилона фойдаланиш ва ҳуқуқий асосларини янада такомиллаштириш масалалари муҳокама этилди.
0
79 
