Ўзбекистон делегациясига ташқи ишлар вазири ўринбосари Дилшод Ахатов, Швейцария делегациясига эса Ташқи ишлар федерал департаменти (вазирлиги) давлат котиби ўринбосари Кристина Марти Ланг раҳбарлик қилди.
Муносабатларнинг конструктив ва ўзаро манфаатли эканлиги ҳамда бу турли даража ва шаклларда мулоқотни кенгайтиришга имкон бериши қайд этилди. Истиқболли қўшма лойиҳалар бўйича батафсил музокаралар ўтказиш, аниқ ва қатъий келишувларга эришишга мўлжалланган икки томонлама бизнес тадбирлар ташкиллаштириш учун делегациялар ташрифларини амалга оширишга томонларнинг тайёрлиги маълум қилинди.
Мулоқот чоғида парламентлараро ҳамкорликни чуқурлаштириш масалалари муҳокама қилинди. Швейцария вакиллари, жумладан парламент аъзолари Ўзбекистонда 22 декабрь куни бўлиб ўтадиган парламент сайловига кузатувчи сифатида таклиф этилди.
Музокараларда икки томонлама савдони диверсификация қилиш бўйича комплекс тадбирлар батафсил таҳлил қилинди. Ўзбекистон томони Швейцарияга тўқимачилик, озиқ-овқат, кимё ва нефть-кимё, сим-ўтказгич маҳсулотларини етказиб бериш масаласини кўриб чиқишни таклиф қилди.
Учрашувда илмий ва таълим алмашинувларини кенгайтириш ҳамда стажировкалар ташкил қилиш бўйича таклифлар кўриб чиқилди.
БМТ ва унинг тузилмалари ҳамда бошқа халқаро ташкилотлар доирасидаги ҳамкорликнинг долзарб жиҳатлари юзасидан ҳам фикр алмашилди.
Маслаҳатлашувларда Швейцария элчиси Оливье Шав иштирок этди.
Манба: Kun.uz
0
161 
