Извините, этот техт доступен только в “O´zbek”. For the sake of viewer convenience, the content is shown below in the alternative language. You may click the link to switch the active language.
Ассалому алайкум, азиз ўқувчилар!
«Ўзбекистон иқтисодий ахборотномаси»нинг махсус сони саҳифаларида сизни қутлашдан мамнунман. Ушбу нашрда нафақат Ўзбекистон ва Бирлашган Араб Амирликлари ўртасидаги турли соҳаларда, айниқса, савдо-иқтисодий ва сармоявий жабҳалардаги муносабатларнинг бугунги ҳолати, балки, энг муҳими, кўп қиррали ҳамкорлигимизни янада ривожлантириш истиқболлари билан танишиш имкониятига эга бўласиз.
Ўзбекистон Республикаси Президенти Шавкат Мирзиёев ва БАА Президенти Шайх Халифа бин Зайд Ал Наҳаён ўртасида савдо-иқтисодий, инвестициявий, молиявий ва бошқа соҳаларда эришилган келишувларни амалга ошириш борасида ҳар иккала томон бугун фаол саъй-ҳаракатлар олиб бормоқда, юртимизда БАА сармоядорларининг фаолияти ҳар томонлама қўллаб-қувватланмоқда.
Мамлакатимизнинг Абу-Дабидаги элчихонаси ва «Ўзбекистон иқтисодий ахборотномаси» таҳририяти ҳамкорлигида чоп этилган ушбу журнал саҳифаларидан ўзаро ҳамкорликнинг турли қирраларини қамраб олган ранг-баранг мақола ва интервьюлар жой олган. Улар ўзбек, араб, инглиз ва рус тилларида ўқувчиларнинг эътиборига ҳавола этилгани, шубҳасиз, алоҳида аҳамиятга эга.
Журналнинг махсус сонида икки мамлакатнинг нуфузли муассасалари, вазирлик ва идоралари раҳбарларининг Ўзбекистон ва Бирлашган Араб Амирликлари ўртасидаги муносабатлар, ўзаро алоқаларнинг ўсувчанлик даражаси ҳамда уларнинг истиқболларига оид фикр-мулоҳазалари ўз ифодасини топган.
Жумладан, Ўзбекистон Республикаси ва БАА ўртасидаги савдо-иқтисодий ва техникавий ҳамкорлик бўйича Ҳукуматлараро комиссиянинг жорий йил апрель ойида бўлиб ўтган IV йиғилиши, Ўзбекистон Савдо-саноат палатаси ва БАА Савдо-саноат палаталари федерацияси ўртасидаги фаол алоқалар, икки мамлакатнинг Ислом ҳамкорлик ташкилотига аъзо давлатлар сифатидаги яқин муносабатлари, мамлакатларимизнинг парламентлараро алоқалари сингари мавзулар, юқори аҳамиятга молик бошқа йўналишларни қамраб олган мақола ва суҳбатлар кўп сонли журналхонларнинг эътиборига ҳавола қилинган.
Нашр савдо-иқтисодий, сармоявий-молиявий соҳалар билан бир қаторда мамлакатларимиз ўртасидаги давлат бошқаруви, соғлиқни сақлаш, диний илмлар ва бағрикенглик, зиёрат туризми сингари жабҳалардаги ўзаро муносабатлар равнақи каби мавзуларни ҳам кенг очиб бергани диққатга сазовор.
Шу билан бирга, икки мамлакат дипломатия ваколатхоналари раҳбарларининг ўзаро ҳамкорлик ва унинг истиқболларига доир билдирган фикр-мулоҳазалари ҳам сиз, ўқувчиларда катта қизиқиш уйғотишига ишончим комил.
Журналнинг ушбу махсус сони Ўзбекистон Республикаси мустақиллигининг 30 йиллиги ҳамда Бирлашган Араб Амирликлари ташкил топганининг 50 йиллиги кенг нишонланадиган йилда чоп этилгани эса барчамизга алоҳида мамнуният бағишлайди.
0
160 
