Президентимиз раҳнамолигида мамлакатимизда мустақилликнинг дастлабки йиллариданоқ кичик бизнес ва хусусий тадбиркорликка катта эътибор қаратиб келинмоқда.
Ўтган йиллар давомида бу борада кенг кўламли ишлар амалга оширилди. Чунончи, тадбиркорлик фаолиятининг барча турларини кенгайтириш, кичик бизнесни ривожини рағбатлантириш учун зарур ҳуқуқий асослар ишлаб чиқилди.Амалга оширилаётган изчилислоҳотлар натижасида Навоий шаҳридаги кичик бизнес ва хусусий тадбиркорлик субъектларининг иқтисодиётдаги ўрни тобора мустаҳкамланиб бормоқда.
Навоий шаҳридаги “Триумф горняк” масъулияти чекланган жамияти қошидаги “Mirtex” тикувчилик мажмуасида 18 турдаги маҳсулот тайёрланмоқда, деб маълум қилади ЎзА сайти. Корхонада буюртма асосида махсус кийимлар ҳамда мактаб формалари ҳам тикилмоқда. Тикувчиларнинг аксарияти коллежни битирган ёшлардир. Жорий йил бошида иш бошлаган тикувчилик мажмуасида йил якунига қадар ишчилар сонини 100 нафарга етказиш режалаштирилмоқда. Хусусан, жорий йил касб-ҳунар коллежларини тамомлаётган 7 нафар қиз билан уч томонлама шартнома имзоланди.
– Замонавий тикув дастгоҳлари билан жиҳозланган мажмуада маҳсулот сифатига алоҳида эътибор қаратилаётир, – дейди “Mirtex” тикувчилик мажмуаси бошлиғи Олима Бобоқулова. – Айни пайтда болалар, эркаклар ва аёллар кийимлари тайёрланаётган корхонамизда 60 нафар хотин-қиз меҳнат қилмоқда. Фаолиятимизни йўлга қўйишда Ташқи иқтисодий фаолият миллий банкининг Навоий филиалидан олинган 159 миллион сўмлик кредит маблағи жуда қўл келди, 115 дона тикувчилик жиҳозлари харид қилдик, дейди тадбиркор.
Иқтисодиётимизнинг реал сектори кўрсаткичларини ошириш, янги иш ўринларини ташкил этиш, замонавий маҳалла гузарлари ва спорт иншоатларини барпо этишда фаол қатнашиш, аввало, ҳар бир фуқародан ижтимоий-сиёсий фаоллик талаб қилади. Жамиятимизда мулкдорлар қатлами вакиллари сонини кўпайтириш ва кичик бизнесни иқтисодиётимизнинг таянч бўғинига айлантириш мазкур йўналишдаги ислоҳотларни янги босқичга олиб чиқишга қаратилгани билан аҳамиятлидир.
0
57 
