Мамлакатимизда тўқимачилик саноати йилдан йилга ривожланаяпти. Хусусан, иккиламчи хомашё – пахта чиқитидан нотўқима мато ишлаб чиқаришнинг аҳамияти ошиб бормоқда. Вилоятимизда ҳам ушбу соҳани янада юксалтириш мақсадида бир қатор истиқболли лойиҳалар амалга оширилаяпти. Жумладан, вилоят саноат салоҳиятини ривожлантириш дастурига асосан Қамаши туманидаги “Манғит жозибаси” илмий ишлаб чиқариш савдо корхонасида айни шу йўналишда қиймати қарийб 400 миллион сўмлик лойиҳа ҳаётга татбиқ этилди.
– Ушбу маблағнинг асосий қисмини хомашё сотиб олишга йўналтирдик, – дейди корхона раҳбари Фурқат Қорахонов. – Шунингдек, янги цехимизни Россияда ишлаб чиқарилган ускуналар билан жиҳозлаганмиз. Маҳсулот ишлаб чиқариш ҳажмини бозор талабига қараб белгилаймиз. Ҳозирги кунда ўртача 800 погонометр нотўқима мато ишлаб чиқараяпмиз. Пахта тозалаш заводлари билан ҳам шартномамиз бор. Цехимизда асосан ёшлар меҳнат қилаяпти.
Эътиборлиси, мазкур тадбиркорлик субъекти момиқ ишлаб чиқаришда ҳам юқори самарадорликка эришаяпти. Корхона томонидан ишлаб чиқарилган ушбу маҳсулотга талаб ошаётганини алоҳида қайд этиш лозим.
Мазкур мақола qashqadaryogz.uz сайтидан олинган ҳолда тақдим қилинмоқда
0
57 
